بربك بسألك بغيابي ذكرتيني ؟

ياخيراً .. مابغيتي تقلبي الصفحة وعلـي تجيـن
على أعصابي وربي ليـن شرفتـي وجيتينـي
قبل ماتوصلين لصفحتي خفت إنـك تمليـن
وترمين المجلة مـن يدينـك وأبتلـش فينـي
عموماً ماعرفتيني انا ؟؟؟؟؟؟ ناظرينـي زيـن
تهجّي صورتـي وإتمعنـي فينـي وشوفينـي
صحيح إن الحزن سوّا سواته من ثلاث سنيـن
وغيّر في ملامح شاعـرك يومـك تركتينـي
ولكن بي علامة فارقـة مـن يومهـا للحيـن
دخيلك ركزي هي لـو لقيتيهـا عرفتينـي
دخيلك شوفي عيوني وقولي لي وش تشوفين ؟
أنا باعلمك .. (مشهد فراق ومسرحه عينـي)
تعالي إتفرجّي .. مشهد من إخراجك سنة ألفين
إلين ألحين يعـرض ويتـوزع فـي شرايينـي
بكيتك وقتها لين أنفجر تحت الهدب عرقيـن
توسلتك .. طلبتك بـس ماكنّـك سمعتينـي
على إللي صارلي منك يابنت الناس لو تدريـن
شمت فيني المكان إللي على صـدره رميتينـي
جلست أتأملك يامقفية فـي عينـي تذوبيـن
وجمعت إللي بقى مني وجا واحـد يواسينـي
أثاريه الشعر جاني بهيئة شيـخ فـي الستيـن
وفي كالعادة إليا ضـاق صـدري مايخلينـي
تجاهلته وطبطب فوق كتفي قال : قول آميـن
(عسى الله ينتقم منها) وصـد وراح يبكينـي
بعدها كل ماكلمتك تقوليـن لـي : وبعديـن
شهر .. شهرين أحاول فيك لكنـك تردينـي
عرفتي من أكون ؟ إتكلمي ماسمع وش تقولين ؟
بربـك.. أسألـك بالله بغيابـي ذكرتينـي ؟
قسم بالله مانسى ماحصل منك ليـوم الديـن
كفاية واقلبي الصفحة ترى من جـد كافيني

قسم بالله يكفيني
قسم بالله يكفيني